حكايات عن ديك شهرزاد

عن الكتاب

... والبنت اللي كانت طول عمرها شغالة في بيوت الناس قررت النهاردا إنها ماتشتغلش..... والولد اللي كان دايمًا بيطبخ في بيوت الناس قرر النهاردا إنه مايطبخش..... والبنت قالت لنفسها.. "يعني هيحصل إيه لو إني ماشتغلتش النهاردا الشقق مش هتنضف؟!."...... والولد قال لنفسه.. "يعني هيحصل إيه لو إني ماطبختش النهاردا الناس مش هتاكل؟!"...... والبنت قالت لنفسها.. "وافرضي الشقق مانضفتش يوم.. يعني خلاص الدنيا هتتقلب؟!"...... والولد قال لنفسه.. "وافرض إن الناس ماكلتش يوم يعني خلاص هيموتوا م الجوع؟!"...... والبنت اتخيلت نفسها وهي قلبه الدنيا وحلمت إنها مهمة جدًا حتى أكثر من ديانا اللي دايمًا سارقة أحلامها بصورها اللي ماليه الجرايد...... والولد اتخيل نفسه وهو متحكم في حياة الناس وحلم إنه مهم جدًا حتى أكثر من تشارلز اللي خطف منه ديانا اللي غرق في عينيها ومات فيها يوم ماشافها في الجرنان بالمايوه...... والولد والبنت قفلوا كراسة يومهم وخرجوا...... من أول بيت عدت عليه البنت بصت ديانا ونادتها... طلعت... وبكت.. وبدأت تنضف الشقة...... ومن أول بيت عدى عليه الولد ناداه تشارلز.. طلع.. وبكى.. وبدأ يطبخ........ والبنت اللي شغالة في بيوت الناس أصرت إنها بكرة ماتشتغلش...... والولد اللي دايمًا بيطبخ في بيوت الناس أصر إنه بكرة مايطبخش...... وقالت لنفسها....... وقال لنفسه...وخرجت ديانا تقابل تشارلز....