حكايات عن ديك شهر زاد

- حكاية أول قصة قصيرة.. اكتبها أفتكر... لما كنت صغير قامت في دماغي في يوم من الأيام أكتب قصة.. ليه ماعرفش.. وأفتكر إني كتبت قصة.. وأفتكر كمان إنها كانت عن ولد صغير جدا، وجميل جدا، وبنت صغيرة جدا، وجميلة جدا.. حبوا بعض بشكل ما من أشكال الحب إللي يعرفها بس العيال الصغيرين.. أنا كنت سعيد جدا بقصة الحب ده، لكن في نفس الوقت كنت مكسوف جدا لدرجة إنى خبيت القصة كلها عن أي حد أعرفه، لكن أفتكر برضه إنّه في يوم من الأيام أنا وجدت القصة في إيد أبي... ماعرفش إزاى عثر عليها.. لكن المهم إنّه بعد ما قرا القصة.. رمى في وشي بالكراسة وضربنى قلم أو قلمين مش أكثر ومشى غضبان... ليه؟.. برضه ماعرفش.. ساعتها حزنت جدا.. جدا.. وقطعت قصة الحب قطع صغيرة جدا.. جدا خوفا من إن أى حد تاني يقراها ورميتها في الشارع ونسيت القصة.. من ساعة واحدة بس أنا عثرت على أول قصة قصيرة كتبها ابني الصغير جدا.. جدا.. وقريتها.. ومن ساعة واحدة بس أنا رميت ابنى الصغير جدا.. جدا بالكراسة في وشه وضربته قلم أو قلمين مش أكثر.. وقلت لنفسي.. "ولد صغير جدا يحب بنت صغيرة جدا.. قلة ادب".. ومشيت غضبان وتوقعت إنّه هيرمي بقطع الورق الصغيرة جدا في الشارع ويحزن جدا.. جدا.. وينسى الحب.